Archive for the ‘Assumption’ Category

ANKVAR MARIECHEM SVORGAR-VHORNNEM

January 19, 2009

*Dr.Ivo da Conceição Souza

Prostavna:

Agostache 15ver Ankvar Mariechem Svorgar Vhornnem, hi porob ami somarombhtat. He porbek koslo orth asa zait? Tea disa ami konnsam Devak bhetthoitat ani tancher axirvad ghaltat. Tea bhair, kheritponnim amcho des Bharat svotontr zala, tea disacho ami ugddas kortat.

Pius XIIvea Papsaiban Novembrache 1ler, 1950 vorsa, bhavarteanchea ddolleam mukhar hem sot dobajean spoxtt kelem: Ankvar Mariek, kuddi-otmea soit, svorgar vheli. Bhavartachem sot hem, tem Munificentissimus Deus, “Sorv-datar Dev”, (MD), Apostolik Ghottnnent proghottailam: “Ami bhavartachem sot koxem spoxtt kortat, Devache ap-proghottnnent tem asa: Devache Nixkollonk Mayek, sorv-ankvar Mariek, ticho sonvsari poinnacho vell somptoch, kuddi-otmea soit Devan svorgachea voibhovant vheli” (Denzinger-Schoenmetzer 3903). Nixkollonk Gorbhsombhov, Deivik Avoiponn ani Sasvott Ankvarponn hea bhavartachea vak’keant asat. Pius XIIvean oxem mhonnlam: “Tichea sonvsari jivitacho vell somptoch”, kiteak dhormxastream modhim bhasabhas choltali: Ankvar Maria meli vo na, ani uprant “tika svorginchea voibhovant vheli”. Devan tika vheli, kiteak ti poili-vhoili rochnna, soddvonnechem prothom’-foll. Jezu jivont zalo, to svorgar aple podven choddlo, ponn Ankvar Mariek Devan vheli. Ak’khe veaktin, kuddi ani otmean, tika jivont keli. Svorginchea voibhovant, mhonnche zago-vell na (beyond the categories of time and space), thoim ghott-khol sombondhant Povitr Trithve mukhar ani Jivont Jezu mukhar ti geli.

Bhavartan ami hem sot manun ghetat. Hem sot dusream sotam kodde vinnlolem asa: svorginchem dorxonn (beatific vision) ani kuddichem jivontponn.

Dhormxastreanchea mota pormonnem, Ankvar Maria Svamia sovem meli, Jeruzaleak, Gethsemanichea mollea lagsar tika nikhipilea, ani tichea Puta bhaxen, tichi kudd mornna ani nikhipinnea uprant kusonk na, ponn tika ubhi voibhovan bhitor kaddli.

Oithiasik Drixttavo ani Orth: Pius XII-vean ugddas kela: Novi Eva (Maria) ani Novo Adanv (Krist), hanche bhitor ghott soirigot asa—Even pap adharlam, tacher Jezu nove sonstint add zhuzta (Ut 3:15, “poilem xubhvortoman”, proto-evangelium); pap-vaittacher animornnacher add zhuzant Nove Evek mottea promannan vantto asa. Bhageovont Paulu hi xikovn aple Chittimni dita: Eka mon’xa vorvim somestancher mornnan raj choiloilem; ponn Jezu Krista vorvim Devachi doeallai dakholl zali (Rm 5:12-21, polle v.17). Jezu vorvim Dev amkam zoit dita: to amkam punorjivont korta (polle 1 Kor 15:21-26.54-57). Ankvar Mariek punorjivontponnant vantto dita. “Suriachea porzollan nhesloli ek bail, tichea paeam tolla also chondrim’ ani tichea mathear bara nokhetrancho mukutt”—Devache projek Jezu vorvim ani Ankvar Marie vorvim devacho menddro zoit dita (Prok 12:1).

Tika zhuzant vantto mell’la, dekhun Novea Adanvacheai Punorjivontponnachea zoitant tika Svorgar-Vhornnea vorvim mottea promannan vantto asa. Povitr Pustokant hea sotachim mullam-pallam melltat (cf.DS 3900).

Hem sot koxem zolmak ailam, tem dhormxastr amkam dakholl korta: Dhormxevik ritimni hem sot bhavarteanche kholavnne vorvim (sensus fidelium) utpon’n zalam; panchvea xenkddeant Udentiche Kristanv hi porob, “Mariecho Ugddas” (“Memorial of Mary”) Agostache 15ver manoitale. Svorgak zolmop rogtsakxeanchem aslem, te bhaxen hem ailem—taka nanv Greg bhaxen KOIMESIS vo Latin bhaxen DORMITIO, mhonnche Mariechem Nhidop (kiteak Greg bhaxen kriapod koimaw mhonnche nhidunk “ani “morunk”). Mauricius Flavius (582-602), hea Somrajeachea kallant Mariechea Nhidpachi Porob (feast of Mary’s Dormition) eka nirnnoian Agostache 15ver ak’khea Byzantin Somrajant somarombhunk zai asli. Ten’na provochonkar Mariechea kuddisoit Svorgar-Vhornneachi gozal korunk lagle. Romant hi porob satvea xenkddeant, Bhag.Adrian Ilea Papasaibachea kallar (772-795), hi porob manun ghetlea, ani tika “Svorgar-vhornnem” (Assumption), nhoi ”Nhidop” (Dormition), pachartale.

Povitr-sobhent hi porob sovkas bhitor sorli: Livias-cho Bisp, Theoteknos, Jordan doriache dave deger, 550 tem 650 vorsa, Svorgar-Vhornneachi (Greg bhaxen Analepsis) khobor korta. Udentik hem sot atthvea xenkddeant manun ghetlam: Konstantinopl-acho Bhag.Germanus ani Bhag.Juanv Damascene, vhodd Svorgar-Vhornneacho dhormxastri. Ostom’tek, zaiti bhasabhas zalea: adkholli utpon’n zaleo, kiteak Pseudo-Jerom’, nnovea xenkddeant, ek chitt Bhag.Jeromachea nanvan boroilea, tantunt hea sotacher dubhav ghaltalo. Hi chitt Povitr-sobhechea Magnneant (Divine Office) bhitor sorli. Ponn ikravea xenkddeant Pseudo-Agostin-an hea sota khatir boroilem. Modhlea teravea xenkddeant, hea sota khatir zaite zhuzle: Bhag.Albert Vhoddlo, Bonaventura, Thomas Aquin. Uprant zannaramni ani bhageovontamni hem sot fudde vhelem, xekim 1849 tem 1950 vorsamni sobhar bhavarteamni Romak apli orji-magnnem dhaddli, hem sot bhavartachem sot koxem proghottaunk. Pius XIIvean, Maiache 1ler, 1946 vorsa, ek Prosidh-potr boroilem, “Ankvar Deva-Matechi” (Deiparae Virginis)—Bispam lagim tanchem mot ani iadnikanchem ani lovkikanchem mot topasunk maglem. Tancho zobab “hoi” mhonn ailo, Ankvar Mariechem Svorgar-Vhornnem spoxtt bhavartachem sot koxem proghottaunk, hi Devachi khoxi mhonn tannem manun ghetlem. Vatikani Vixvsobhen oxem mhonnlam ki Mariechem Svorgar-Vhornnem “…bhorvanxeachi ani buzvonnechi khunna Devache vattsur projek” (LG 68: “…a sign of certain hope and comfort to the pilgrim people of God”). Hem sot amchea punorjivontponnacho visvas kholaita ani odhik ghott-okhondd korta.

Sompadnni: Xevttim, Ankvar Mariek veaktichi svatontrai mell’lea, toxench Bharatachea putam-duvank aplea paeancher ubhim ravunk sot’tea mell’lea. Sopurnn svotontrai amkam ieta tea jivitant mellteli. Hi sot’tea amim zobabdaren upegunk zai, novo somaz bandunk zai, svorginchi vatt tankunk zai, sobhavachim nagrikam koxim cholunk zai…

Advertisements