Archive for the ‘Biblical-saving truth’ Category

SOT ANI POVITR PUSTOK

January 19, 2009

*Dr.Ivo da Conceição Souza

Prostavna: Devachem Utor mhollear zannvai, rochnnechem utor ani soddvonnik utor. Tem sot amkam kolloita, Devacho gutth amkam ugto korta, amkam soddvonnecho rosto dakhoita. Hem Utor Adlea Korarant thaun Novea-Dusrea Korarant amkam bhitor kaddta. Him Utrachim sobhar mukhamollam amkam topasnne vorvim melltat. Hem Utor amkam Monis zalolea Sobdant mellta (cf.Ju 1:1-18). Jezu Devacho Sobd, to amkam Devachem mukh ugtem korta. Devachea preronnan mon’xamni Devachem Utor boroilam, tor sot amkam Povitr Pustokant mellta. Ponn koslem sot? Povitr Pustok amkam vidhea xikoita? Chuki thoinsor asum ieta?

Povitr Pustokant Chuki asat? Khubdam oxem ami somzotat: Povitr Pustokan amkam sogllea prosnank zobab mellta. Ponn Povitr Pustok amkam vidhea xikoina. Vidhieche nodren, Povitr Pustokan chuki asum ieta, ponn Povitr Pustok soddvonnik Sot xikoita. Ekach utran, chukivinnem Povitr Pustok soddvonnechi vat dakhoita (Dei Verbum 3:11).

Vidhieche nodren chuki asunk xokta, udharonnak: kitle dis buddti asli (polle Ut 7:17—Jahwist–, 40 dis ani ratri, ponn Ut 7:24a—Priestly–, 150 dis; Lk 24:51 Ju 20:17; Mk 16:19 pormonnem Jezucho Svorgar-Proves Paskhanchea disa zala, ponn DI 1:3.9 pormonnem Jezu 40 disam uprant svorgar eka kupacher voyr gelo. Vidhieche nodren prithvik tin malloi aslet: ontrall, jog ani sheol; ontrall eke kampini bhaxen asa, oxem purvoz somzotalet; oithiasik chuki: raza konn-konn asle (Dan  5:1-31)—soddvonnik sot mhollear Dev ithiasacho Dhoni, sogllea somrajancher (empires) ani rajancher (kingdoms) to apli rajvoddki choloita, Babylon poddta, ponn chuk asa ti hi: Belshazzar (mhonnche May-God-Bel-protect-the-king“), Nabonidus-acho, nhoi Nebuchadnezzar-acho put, taka “raza” hem nanv mellunk na; ani naitik chuki: herem, dusmanancho sarkoch nas korun, Devachi khoxi korunk, “holy war”–Jos 11:10-15–; bhatak-bhat divpacho kaido (law of retaliation), “ddolleak ddolo, dantak dant” (Sutt 21:24; Lev 24:20; DS 19:21); “polygamy” (ekavon odik bailankodde logn zavop); “divorce” (logn-modd, DS 24:1-4—thoddeach kallar, Mal 2:16).

Novo Korar amkam xikoita: Povitr Pustok pallun ieunk zai: “Svorg ani sonvsar soro poreant ghoddonk zai, titlem-i ghoddlea xivai, Somurtintlem ek soglleam-von lhan okxar vo okxarank lail’li ek supurli kuru legun na zaunchi na” (Mt 5:18). “Je porim provadia vorvim oxem boroilolem asa”, odhikaran Povitr Pustokachea utrank boroinnar ul’lekh korta (Mt 2:5). Ovghodd asot, zalear amkam tem utor somzunk na, ponn chuk thoinsor na, oxem Povitr Pusotkache vivronnkar mhonntale.

Sobhar Motam: Bhavartache ani naitik babtintoch (in matters of faith and morals) chuki nant, oxem Salvatore di Bartolo mhonntalo. Hem mot Benedikt XVvean nakarlam (Spiritus Paraclitus, 1920). Kardial John Henry Newman lhan sangnneo bhairaitalo (obiter dicta). Erasmus (1536) Adlea Korarachim utram bhairaitalo. (Heo xikvonneo Leo XIIIvean, Providentissimus Deus (1893), hea Prosidh-potracher nakarleat). F.Lenormant preronna ani prokasnne modhim forok korta—ak’khem Povitr Pustok preronnan boroilam, ponn sogllem ugtavnni nhoi; prokasnni asa, thoinsoroch amim chukivinnem mhonn hoikar diunk zai. Ithias drixttipoddta toso boroitat (Marie-Joseph LAGRANGE ani  F.Von HUMMELAUER). Hea motacher Benedikt XVvean aplo tallo ubarla, Spiritus Paraclitus (1920), hea Prosidh-potracher. Dusrea boroinnaranchem kaddlam, ten’na chuki asot, tor tea boroinnaracher thapoichem (Ferdinand PRAT). Hi xikvonn “Pontifical Biblical Com­mission”-an naikarlam (Fevrerache 13ver, 1905 vorsa). Ponn hanga monant dovorchem: Jen’na boroinnar dusreanchem kaddta, tanchem nanv kaddinastona vo noikar diinastona, ten’na to tem sangnnem manun gheta.

Vidhien fudde tanch marlea, ten’na ho vichar ailo: Utpotichem pustok sangta ani vidhea sangta tem koxem mittounchem? Gnean ani bhavart mittoum ieta? Hea vicharak “Biblical Question” mhonntat. Devan prithvi rochlea, oxem Utpotichem pustok mhonnta; ponn Charles Darwin “evolution”, hachi khobor sangta—sogllem prakritlean ailam (“Darwinian Theory of Evolution”). Tor hem koxem mittoum ieta? Povitr Boroinnar hea vicharank zobab diina.

Margdorxonn: He babtint amim hem margdorxonn ddolleam mukhar dovrunk zai: Povitr Pustok vidhea xikoina, mhonntoch Charles Darwin xikoita tea pormonnem Povitr Pustok xikoita, oxem amcheamni mhonnum nozo (“concordism”), ponn Devacheo vatto amkam xikoita. Amchem ulovp amim bodlunk zai: Povitr Pustokant kosleoch chuki nant, oxem mhonnche boldek amim mhonnunk zai: Povitr Pustokant Dev mon’xakullak Soddvonnechem Sot kollit korta. Povitr Pustok vidhea xikoina: prithvi koxi zolmak ailea, monis koso vikasla, hem xikoina, ponn Dev amkam mog dita and soddoita mhonn asvason dita. Bhag.Augustin oxem mhonta: Dev amkam Kristanv korunk sodta, nhoi vidhneani (scientists) (“Christianos facere volebat (Dominus), non mathematicos” (De Actis  cum Felice Manichaeo, 1.10, MPL 42, 525). Dev mon’xank mon’xall pod’dotin uloita, dekhun jem kitem ghoddta, ghoddta toxench sangun dita, udharonnak: suria voyr sorta, suria poddta; dis dharir poddta (cf. Ut 1:6; St 104:5; Lev 11:6). Khubdam amkam kherit bhas rupokamni (metaphors) vinnlolem mellta, udharonnak: “Ontrall Devachi mhoima vornnita, mollob tachea hatanchem kam’ proghott’a!” (St 19:1), mhonnche svorg Devachem asnnem ani tache gunn dakhoita, bollixtt, mhoimevont Dev asa mhonn dakholl korta.

Boroinnar dharmik borovpi, nhoi ek vidhiecho monis (scientist). Tacho hetu mhollear dharmik sot xikounk, nhoi vidhiechem sot. To soimachim ghodditam ddolleank drixttipoddtat, toxinch sangun dita.

Vatikani Vixvsobha II soddvonnik sotachi khobor korta: “Amche soddvonne pasvot, sot Povitr Pustokamni boroun dovrum-xem Devak dislem; ten’na, Povitr Pustokantlim pustokam hem sot thirayen, khatren ani chukivinnem xikoita mhonn manun gheunk zai” (Dei Verbum 3:11). Povitr Pustokant chuki mellonant, jen’na soddvonnik sot tem amkam xikoita, nhoich bhavartachea ani naitik mollar. Tem chukivinnem, kiteak Devak zai aslem tem ghalta amkam soddvonnecho rosto dakhounk. Kardial Augustine BEA mhonnta: Povitr Pustok amkam svorg koso aila, tem nhoi, bogor ami svorgar koxim vechim, hem xikoita”.

Sot khoim mellta ani koxem mellta? Sot ak’khea Povitr Pustokant mellta, jem kitem Adlea-pornnea Korarant mellta, tem Novea Korarachea uzvaddan topasunk zai. Udharonnak: sheol meloleancho zago aslo, ponn atam Jezu vorvim amkam svorga vexim odhik uzvadd mell’la. .

Sot mellta pustokant, jen’na tem te bhaxen vachtat vo onnkarun tacho orth ghetat. Ek pustok koxem tem vachunk zai. Tantunt xikvonnecho vikas (doctrinal development) mellta. Kiteak mon’xak survatek xempddi asli, dekhun monis xempddechem zon’var mhonnum nozo. Sheol, hachi xikvonn az amkam lagta, oxem mhonnum nozo. Son’varacho kaido az amkam lagta, oxem-i mhonnum nozo. Kristachi xikvonn mell’lea, tea uzvaddan amim him sotam somzunk zai. Sot jinosvar sahitik bhasam (literary genres) ani poddbinnam (myths) vorvim amkam mellum ieta. Eka pustokachi xikvonn konn? Oso vichar amim korunk zai. Ithias (history) vo kadambori rochop (fiction), hem sogllem amkam mellta, ponn sot kitem ieta, tem sodpus korun topasunk zai. Udharonnak: Jonah-chea pustokan soddvonn sogllea mon’xank mellta, hem sot asa. Dekhun amim boroinnarachem mon topasunk zai, tacho somajik sondorbh, purannik orth, hem sogllem polleunk zai. Pius XII Papasaiban sahitik bhaso vo jinos (literary genres), hancher uzvadd ghatla, aplea Prosidh-potracher Divino Afflante Spiritu (1943).

Jonah-chem pustok oithiasik nhoi, ponn ek kanni—soddvonn, nhoich Judevank, ponn on-Judevank mellta mhonn xikounk sodta (‘didactic fiction’, not a histori­cal book–it teaches that salvation is universal).

Porampora sodun kaddunk zai, bharik-khol foddnixi korunk zai… Boroinnar kitem sangunk sodta tem topasunk zai. Povitr Pustok kitem xikoita ani kosli sonvskruthik pod’dot vapoddta, hem polleunk zai. Utpotichea pustokant oxi amkam xikovn mellta: sogllem Devakoddlem ieta, ponn koxi prithvi utpon’n zata, hem amkam Devachem Utor sangina, ponn vidhea uzvadd dita.

Sompadnni: Xevttim, Povitr Pustok pustokanchem pustok mhonn amkam gomon ieta. Tem amkam khub vollokh dita, ponn vidhea xikoina, kiteak tem dharmik pustok. Tem amkam soddvonnecho rosto iskuttavn dita. Svorginchea Bapan amkam apli evzonn kornnentlean ani utrantlean ugddapi kelea. Hem Pustok amim vach’chem, uzvadd gheuncho, taka man diuncho, amcheo chuki tachea uzvaddan manun gheuncheo, amchem jivit nittayer ghalchem…

Advertisements