Archive for the ‘Gospels’ Category

JEZUCHEA KOXTTAM-MORNNACHI KOTHA

January 19, 2009

*Dr.Ivo da Conceição Souza

Prostavna: Hea dhormsevik kallar ami ho sodpus korum-ia. Jezuche koxtt niyallunk bhov adhavachem. Kitem ghoddlem ani amkam kitem favlem, hem hea Xubhvortomananchea xikpa vorvim gom’ta. Jezuchea Koxttanche pordhe ami polleum-ia and tancho faido ami kaddum-ia.

Kothechi   Banddavoll/Vanttop: 1)Paskh-Jevonn 9Mk 14:12-26); 2)Gethsemani molleant Jezu magnnem korta (Mk 14:32-42); 3)Jezu   Bondkhonnint   ani Porom’-Iodnika  mukhar techi nit (Mk 14:43-54; Lk  22:47-54;  Ju 18:3-14.19-24); 4)Pilata mukhar Jezuchi nit (Mk 15:1-5; Lk  23:1-5;  Mt 27:1-2.11-14; Ju 18:28-19:16a); 5)Jezu Herodi  mukhar  (Lk 23:6-12);  6)Jezu novean Pilata mukhar (Mk 15:6-15; Lk  23:13-25; Mt  27:15-26; 7)Pedru vatten Jezucho Nhoikar  (Mk  14:66-72;  Lk 22:56-62; Mt 26:57-58.69-75; Ju 18:12-18.25-27); 8)Khursar  Khil­lavnni ani Jezuchem Mornn (Mk 15:21-32; Lk 23:26-43; Mt 27:32-44; Ju 19:16b-27).

Hi Koxttam-mornnachi Kotha dhormsevent sobhemazar vachtalet. Hea kothechi banddavoll sogllea bhavarteanche vollkhichi, tankam ghodditancho sumar aslo, ponn ti motthvi (elliptical) zaleli. Koxttanchi kotha chear bhagamni vo pordheamni vanttum ieta: Gethsemai molleant prarthon/dhorop’ Judev Mon’subi; Romi Mon’subi; ani khursar marop/nikhipinnem. Hi kotha sobhemazar dhormsevent vachtalet. Poilo atthap (schema) hea Xubhvorotmanmni melltat, to soglleank vollkhico ai bhavarteank ghodditanchi volleri som’zunk melltalem, ponn hi kotha motthvi (elliptique) zatali.

Jezuchi Mon’subi:

Jezuche koxtt ani mornn vachpeank eke vatten dubhav  haddtat ani  dusre vatten tokhnnayen bhortat. Jezuk kiteak  mhonnun  khursachea mornnachem formonn favo zalam zait?

Jezuche  Koxtt  ani Mornn: Jezuchea  Koxttam-mornna  vixoim porampora bhov vegim akarun ieilea. Sogllea Xubhvortomanamnim  hi kotha amkam mellta, ponn Juanvachea Xubhvortomanant odhik orthab­horit  dekhave  ani vak’ke melltat:  “Jezucho  vell/tas“–Devache porjechea  dusmanancher  zoitacho vell to  (Dn  8:17-19;  11:35). Jezucho  “vell” mhollear “Mesiacho tas” vo “Koxttancho tas (Mk 14:35.41).  Juanvachea  Xubhvortomanant, “Jezucho  tas”  mhollear soddvonnik vaurachi tengxi (cf.Ju 2:4; 7:30; 8:20; 12:23; 13:1; 17:1). Juanvachea Koxttanchea Ithiasant, he vixoi amkam melltat: “Jezucho tas“, “Mon’xachea Putachi ubarnni“, nimnnea  ghoddnnu­kanchi  opekxa (anticipation)”, “techem patxaiponn”  (raiall/sod­dvonnik bazu).

Synoptik  Xubhvortomanamni,  tin bhakitam  Jezuchea  mornna vixoim amkam melltat (Mk 8:31-9:1.30-32.32-34; Lk  9:22-27.43b-45;  18:31-34; Mt  16:21-28; 17:22f;  20:17-19),  tech  bhaxen Juanvachea  Xubhvortomanant Jezuche ubarnne vixoim  tin  bhakitam amkam  melltat (Ju 3:14; 8:28; 12:32-34). Tenchi mull-zhor  mhol­lear  Yahwehchea Sevokachem Chovthem Git (eved YAHWH,  Iz  52:13; Dan 7; cf.DI  2:33; 5:31; Fil 2:6-11). Synoptik  Xubhvortoman’karam  pro­manne, techea Svorga-choddnneant tem bhakit sakar zata.  Chovthea Xubhvortomana  promannem,  tem  bhakit  Khursar  sakar  zata  (Ju 12:33).  Jezuk  Patxai  koso Bapachea uzvea  hatak  zago  mellta; ten’nam thann to aplem dhoniponn apleancher choloita (DI 2:34-36; Fil 2:11; Ju 3:14-15; 8:23 ani 12:31-32): Jezu khursar Soddvonnar ani  Raia koso choddta. Khursar ravun Jezu sogllea mon’xank  apn­naxim  oddun haddta ani tenkam soddvonn dita. Khursar ravun  zol­lim-mollim ximpoddlolea Devachea bhurgeank Jezun ektthailim  (Ju 11:52).  Zhoddti mon’xachea tharava pormannem Jezu  mukhar  zata, toch  Uzvadd ani Sot (Ju 3:18-19). Hem Jezuchea ak’khea  jivitant ghoddta,  ponn  bhovkorn techea “vellant” (Jn  12:31;  polle  Jer 31:10).

Devachim bhurgim Pentekostichea Disa ektthaim zatat (DI 2:5-11).  Ponn  Juanva pormannem, Jezu khursar choddta,  ten’na  hem vismit ghoddon ieta (Ju 11:52; polle 12:32).

Neai-khottlo (Trial of Jesus):

a) Annas-axim: Jezuk ratrim Porom’-Iodnikaxim vhortat,  thoim adlea vorsacho Porom’-Iodnik, Annas, Kaiaphasacho sasupai,  teche xikovnne vixoim topasnni korta.

Jezu khotto govai zalear Annas Porom’-Iodnik topasunk sodtalo.  Lok ojaptalo: “Taka xikxon na, ponn  zannvai  khoinchi aili?” (cf.Ju 7:15). To lokak uchambollaita. Akhi Mhasobha sokal­lim  zomon,  Jezu vixoim nirnnoi ghetoli  asli–Jezuk  mornnachem formon  rajki fuddari koso diunk ani Romi odhikareachea  hatamnim teka  ghalunk (Lk ratriche sobhechi khobor korina (cf.Lk  22:66), fokot Ju 18:12.19 ani Mk 14:53 he sobhechi gozal kortat; Mt 26:57 Kaiaphasachich khobor korta). Kaidea promannem, Judev mhasobhechea vangddeancho ratrcho mellavo korum nozo aslo (Mishnah, Sanhedrin 4:1). Sobhar govaiam­nim, ekeklean, tornno to zannto porean, apapli govaiki diunk  zai asli;  ani dog govai tori eksarkhe zaunk zai aslet  (DS  19:15). Teabhair,  mornnachem formon diunk ek ratr tori sorunk zai  asli, kiteak tem formon bodlunk sodta, zalear thoddo tori soeg mellto­lo aslo (Sanhedrin 4:1).

Judev  dharmik  fuddari, mukhel iodnik  ani  xastri, Jezuk nattak  korunk  sodtalet, kiteak tenkam Jezuchea  probhavak  ani namnnek  lagun nosai zatali. Ponn thodde sotak  bhietale,  kiteak Jezu  niropradhi  mhonn te zanno aslet (polle DI  5:34-39:  Rabbi Gamaliel aplo tallo ubarta ani dhormdutank soddat mhonn  magta, kiteak  te  kortat to vavr Devacho, to fudde  vetoloch!).

Annas  Porom’-iodnik  Jezuchea  xisam  ani  xikovnne  vixoim vichar korta (vv.19-23), tennem devmondira sombondhim ani  Mesiah sombondhim  kitem  xikoilam tem topasunk sodta.  Ponn  eksarkheo govaio mellonasleo (cf.Ju 18:19; Mk 14:55-64).

Annas  Jezu lagim vichar korta. Ponn govaiank vichar  korunk zai  aslo,  nhoi Jezuk. Dog govai eksarkhe,  zalear  teka  formon poddtalem,  to kitem-i sangum (DS 19:15). Jezu  mhonnta:  “Hanvem ugteponnim sogttam hujir uloilam; hanvem sodanch devsthanant  ani devmondirant  xikoilam,  zhoim soglle Judev ektthaim  zatat,  ani kainch guptim ulounk na. Mhojelagim kitem vichartai. Hanvem kitem xikoilam tem mhaka aikotoleam lagim vichar. Polle! Hanvem sanglam tem tor te zannont” (Ju 18:13.19.20).

Kaiaphasa-xim: Annas Jezuk Kaiaphasa-xim dhaddta. Dog  govai mhonntat: Aponn devmondir aplea hatamnim tim disam bhitor  moddun uddoitolo ani to tin disamnim novean bandtolo mhonn tennem sangun dovorlam. Ponn lhonv katortoleam mukhar eka menddrea porim,  Jezu ogoch  ravlo  (Dt-Is 53:7; cf.Mk 14:61). Dekhun  teka  mornnachem formon favtalem (DS 17:12). Jezu apli svorgaveli xikovn  mon’xall odhikareak odhin korunk sodinaslo, dekhun teka mornnachem formon favo:  devmondiracher  devninda ani techem  opmanachem  (contumacious) ogeponn.

Tea bhair, jen’na Porom’-Iodnikan Jezukodde vicharlem:  “Tum Krist, Sorvexvoracho Put?”, Jezun zobab dilo: “Hoi, hanv to;  ani Mon’xachea  Putak  dev-podvechea uzvea hatak  boslolo  ani  svorginchea  kupam velean ailolo tumi dekhteleat” (Mk  14:62;  cf.Dan 7:13; Str 110:1), mhonnche Devache podvent teka vantto  melltolo.Hem  Mesiahchem raj az thann suru zatelem–Jezuchea  mornna,  ji­vontponna ani svorgar-vhornnea borobor (cf.Lk 4:21; 5:10;  12:52; 19:9).  Hem  aikun, Porom’-Iodnikan aplem  angvostr  pinzlem  ani tiddken mhonnlem: “Tuminch hi devninda aikolea, anik govai  amkam kiteak  zai?” (Mk 14:63).

Ponn Jezun Devachem nanv kaddunk na, nhoi mhonn techem  nanv boxttavnk  na  (Lv  24:16; Mishnah Sanhedrin  7:5).  Ponn  techea zobabachea  nimnnea  vantteant devninda asa:  to  Devachea  uzvea hatak  techea  rajeant bostolo. Dekhun  teka  fatravn  mornnachem formonn favtalem (Lv 24:16). Ponn Judev Mhasobhechean mornnachem formon diunk zainaslem. Hi podvi Romi odhikareak dovorloli (cf.Jn 18:31).

Mhasobhechea  dusrea  vicharak, “Tum  Devacho  Put?”,  Jezun Kaiaphasak mhonnlem: “Hoi” (Mk 14:62) vo “Tunch sangtai” (Aramaik bhaxen amartha, Mt 26:64; Lk 22:70), mhonnche: Hanv patxai,  ponn rajki  nodren nhoi, mhojem raiponn hea sonvsarantlem nhoi”  (ponn Mhasobha  ek devninda koxi pollena). Poilea zobabant to  mhonnta: “Dev  sot  kitem tem dakhoitolo“. Tor te vichartat ani  teka  ek avhan  ditat:  “Tor tum Devacho Put“, ani  to  protipallta:  “Tum sangtai“.  Ponn ho zobab pavona, toriiastona te  mhonntat:  “Anik kitem zai?”; ani taka Pilataxim dhaddtat.

Pilata-xim: Uprant  teka Pilatache  polasint,  Antonia-chea kottant,  ek  rajki krantikar koso vhelo (Mk 15:1;  Mt  27:1;  Lk 22:1-5;  cf.Ju 18:28-40). Judev Pilatachea razangnnant  (judicial court, Praetorium) bhitor soronant, kiteak Paskhanchi porob lagim asli, ani thoim bhitor sorun te boxttovtele aslet–tenchim sthan­nam mhellim mhonn te somzotalet, kiteak te zolmak ieunk  naslolea bhurgeank  jivexim  marun  thoinsor  purtalet  (cf.DI  11:2f;  Ju 18:28).  Ponn  te eka niropradhea mon’xak  jivexim  marunk  fudde sorlolet! (polle  Strack-Billerbeck, 1:838-839;  cf.Ank  9:6-12; 19:11, oslea sombondak lagun sat dis porean monis mhello  zata). Pilatak ani Herodik kainch guneanv teche sovem mellona. Judev  fuddari,  mukhel iadnik ani xastri,  mhollear  aropi, Romi Rajpal mhollear mon’subdar/nitidar. Pilatan  ek   vichar kelo: “Tum Judevancho Patxai?” (Mk 15:2; Mt 27:11; Jn 18:33).

Judev  fuddari tacher him rajki torechim garamnim  ghaltat, hea khottleachi bharik-sarik khobor Lukas dita: i)To aple  khotte xikovnnen lokak, akhea Judeiant, Galilea meren hangasor  (Jeruza­leak)  porean, uchambollaita, fuloita, fuslaita  ani  sorkaracher add  huskaita  (Zelot  Romi Som’rajeachi  podvi  bollan  poisavunk sodtalet).  ii)Sezarak  potti farik korunk to mona  korta  (Ponn Jezun  ufratench  xikoilam, polle Lk  20:20-25);  ani  iii)Aponn Krist  Rai  mhonn fottingponnan sangta (Lk 23:5; cf.Mk  15:3;  Ju 18:30; khursacho namlekh hem sangta: “Judevancho Raza“).

Jezu  khotto  provadi, hem garannem te  tacher  ghalunk proyotn  kortat.  Dekhun,  taka dhorlea  uprant  ani  bondkhonnint ghatlea  uprant, Jezuchim khebaddam te kortat (Lk 23:2, polle  DS 13:2-6;  18:20)–to  dusreank vaitt rosteantlean vhorta  ani  Devachea nanvan to ulounk fudde sorta.

Rajki  nodren, to aplea xisank Sezaracher add  fuslaita  ani huskaita, ani tankam bondd korunk apoita. To sobhar khunna  korta ani  lokak  voddun haddta. Lok tacher visvas  dhortolo,  ani  Romi odhikari devmondiracho ani Judev projecho bhosm’ kortolo, oxem ek garannem  tacher ghatlem (Ju 11:48). Ponn Jezuk bollan patxai  vo rajki  fuddari  korunk sodtalet, ten’na to pollon  gelo  (cf.Ju
6:15; 12:14).

Herodi-xim: Apnnavelo bhar uddoun kaddunk,  “Galileia”  hem utor aikolea uprant, Pilatan Jezuk Galileiachea uprazaxim,  Herod Antipas-xim dhaddlo (cf.Lk 3:1; 23:6-7). (Lukasacheach Xubhvorto­manant  amkam  Herodichi  khobor mellta,  cf.Lk  23:6-12).  Herod pordhvari  ani prannghatki aslo, Pilatacho dusman. Tea  disamni, Herod Jeruzaleak aslo.

Pilatasun  Herodixim neaikhottlo pavta, ponn  mukhel  iadnik aplem  ferferem vazoit Jezuche pangik lagtat. Teach  disa,  Herod ani  Pilat ixtt vortovlet. Te dogoi dusman aslet, kiteak  Jeruza­leak  porbek ailolea Galileikarank marun, Pilatan tanchem  rogot bolianchea rogtan misoll kelelem (Lk 13:1).

Pilatak  ani Herodik tache sovem kosloch guneanv mellunk  na (Lk  23:14-16).  Ponn Herod Antipas tachim khebaddam  korta  ani taka  soddounk laita. Pilat taka jerbond martolo ani soddoitolo mhonn  sangun  dita, kiteak to lokak bhietalo  (cf.Lk  23:4;  Jn 18:38c; 19:4).

Novean  Pilata-xim: Him garannim aikun,  Pilatan  Jezulagim vicharlem: Tum  Judevancho Raza?” (Lk 23:3). Jezu  toch  zobab dita:  “Tunch hem sangtai” (Aramaik bhaxen amartha, Greg  bhaxen sy legeis hoti basileus eimi), mhonnche: “Hanv raza, ponn hantunt forok  asa“ (‘I am a King with a difference’ (rajki orthan  nhoi). Jezucho  zobab Pilat somzota ani oxem mhonnta: “Mhaka hea  mon’xa sovem kosloch guneanv mellona” (Lk 23:4). Hacho orth amkam spoxtt mellta  (Jn 18:36f: “Mhojem raj hea sonvsarantlem  nhoi“, kiteak “hanv sotak govai diunk ailam” (“I came to testify to the truth“). To  niropradhi mhonn amkam  tin pavtthim   mellta   (cf.Lk 23:14.15.22). Jezuchem raj uzvaddachem, ponn Pilat ozunii  kallk­hachea rajant jieta…

Jezuchea mornnak zapsaldar konn?

Hea vicharak zobab spoxtt zait veta: a) Mukhel  iadnikanchi ani ier fuddareanchi ti poili-vhoili zobabdari. Te mukhel  garan­nim  ghalpi.

b)Pilat  Jezu  sovem kosloch guneanv na mhonn  sangta,  ponn urponjiche bhrantin taka jerbond marun soddounk sodta.  Punndak, Barabbasak, soddounk ponn Jezuk khursar marunk, urponz bob marta. Mukhel  Iadnik,  xastri ani tenche palvi/adhari  Jezuchem  mornn haddtat. Lok agro korun bob martalo, dekhun Pilat urponjik  bolli poddlo.

b)Lokakoi  zobabdari asa. Jem kitem mukhel iadnikamnim  suru kelam, tem urponjin sompadlem. “Perfidi Iudaei” (“ghatki Judev”), him  utram  Povitr Sukrarachea prarthnant melltalint.  Orth  oso:
visvasghatki Judev“, oxem nhoi, ponn Jezucher bhavart dovrunk na te  Judev (adle Latin bhaxen, perfidighatki”  nhoi  (traitors), ponn “bhavart dovrinant te” (non-believing Jews: Jews not believing  in Jesus as the Messiah and the Son of God).

Tech bhaxen, Judev “Dev-marpi” (deicides) mhonn ami som’zota­leat: Judevamnim Devak khursar marla. Te “Dev-marpi“, oxem chin’­tun  ami  tankam  amche dusman  koxe  vagoitalet.  “Tum  sarkhoch Zudev!”, oslea  utramni  ami dusreank eke  krur  kornne  khatir opman’talet. Ho rag Judevancher Adolf Hitler-an Auschwitz  “con­centration  camp“-ant (zhuzachea ksetrant) kaddla, tankam  krut­tamni jivexim marleat…

Sompadnni: Jezuchea koxttam-mornnachi kotha amkam chodd adhavachi. Mel Gibson-an aplea cholchitran The Passion of the Christ pollennarank dukhin patkanchi vikottai gheunk apoita.

He koxtt amkam jivitachi vatt xikounk zai…

Advertisements