Posts Tagged ‘Margao’

Freedom Fighter:T.B.Cunha

January 15, 2011

Tristão de Bragança Cunha (1891 -1958) was a prominent nationalist and anti-colonial activist from Goa (then part of Portuguese India, now modern India). He is popularly known as the “Father of Goan nationalism”, and organizer of the first movement to liberate Goa from Portuguese rule.

T.B.Cunha was born on April 2, 1891 in the village of Chandor in Goa. He complete his school education in Panjim and then went to Pondicherry to French College for his B.A. and then to Paris. There he studied at the Sorbonne University and obtained a degree in electrical engineering. In Paris, Cunha entered the circle of Romain Rolland and helped publicize the Indian independence movement generally, and the case of Portuguese India in particular, in the French-language press.

Cunha returned to Goa in 1926 and he set up the Comissão do Congresso de Goa (Goa Congress Committee) in Goa in 1928 to organize the Goan intelligentsia against Portuguese colonial rule. Pressurised by Portuguese authorities, Cunha transferred operations to Bombay and, in 1938, affiliated his organization with the Indian National Congress. He continued publicizing the Goan case in a stream of articles and books, denouncing Portuguese rule. Among his publications were booklets “Four Hundred Years of Foreign Rule” and “The Denationalization of Goans” (1944). Cunha was an advocate of Goan identification, political as well as cultural, with greater India. In 1946, Cunha helped organize the famous assembly in Margão, inviting the INC speaker, Ram Manohar Lohia, to address what was arguably the first and largest mass gathering yet, setting in motion the Goa Liberation Movement. Along with the other organizers, Cunha was arrested by the Portuguese authorities in 1946. He was kept in dark damp cell at Fort Aguada. He was the first civilian to be tried by a military tribunal. He was court-martialled and sentenced to eight years imprisonment. He was deported to the Peniche prison in Portugal. After his release from Portugal in 1954, Cunha returned to Bombay. Cunha formed and headed the “Goa Action Committee”, to help coordinate the numerous Goan liberation organizations that had emerged by this time. He published a newspaper called “Free Goa”. He died on September 28, 1958.  Loknayak Jaiprakash Narayan was one of the pallbearers. The Government of India issued a postage stamp in his honour.

Heroi no Quarto Aniversário da Morte de Tristão de Brangança Cunha – Poem by Visnum Porobo Sincró commemorating the fourth anniversary of Cunha Bragança’s death.

NOVO KORAR

January 19, 2009

*Fr.Ivo da Conceicao SOUZA

1.1: Zhuzachea kallar ami jietat. Zhuzachim kallim-kitt kirnam raxtranchea mollbar manddleant. Ken’na vixv-zhuz suru zait, hem konnoch nokllo. Hea velar ami xantiche koblatichi khobor kortat. Korar raxttram modhim.

1.2: Abraham bhavartacho bapui.

1.3: Kristanvponn mhonnllear nhesnnancher, nanvancher ani ritichalincher dhorlolem-thaplolem na, oxem ami gel’le khepim mhonnlam. Novenam ani festam, ostomtechim novlam ani chaliriti, hancher Kristanvponnn dhorlolem na. Heo sogleo bhaileo vostu mhonnlear bhitorle novsornnecheo khunna. Bovall, chodd prarthnam, upas, fogetti-hem soglem bhailean amcho on’bhov ucharunk zai, ponn zor tor soglem korun bhitorli, kallzachi akharnni na, zalear soglem om’tea kollxear udok, ddo-ddo-fo…

2.1: Jezuche govai zanvk amam somestank apovnnem asa. Kosloi amcho vavr zavm, ami Jezuche xis. Jezuchea Xubhvortomanachea uzvadda-bollan ami amchem xubhvortoman boroitat. Amchi vatt uxir, ponn sukhak vhorta tosli vatt. Jezuchi adnea mhonnlear mogachi adnea: “Ekamekacho mog korat, jeporim hanvem kela tumcho” (Ju 13:34, hea vak’keant “jeporim” mhonnche Jezu nhoinch amcho namunno, ponn hea deivik mogachi zhor). Ponn hi mogachi adnea sompi nhoi. Zhodd-moskil adnea tantunt atthaploleo asat: “Hanv tumkam khoreponnim sangtam: Gonvacho konno/gotto zom’nnir poddon morona, zalear to eksuro urta, ponn to morot, zalear bhorpur foll/pik dita” (Ju 12:24). “Zor tor konnoi mhozo patthlav korunk sodit, zalear tannem apnnakoch path korchi, aplo khuris vengoicho ani mhojea patthlean ienvchem” ( Mk 8:34). “Tumchea dusmanancho mog korat ani tumcho dves kortoleank borem kor” (Lk 6:27). “Konnak poilo zanvchi khoxi asot, zalear tannem sogleam poros nimanno ani sogleancho chakor zanvcho” (Mk 9:35). Jezuchim totvam amchea soimachim nhoi, tim amkam man’nant zait, ponn tim amkam khoro-niz rosto dakhoitat: mogacho, sukhacho rosto.

2.2: Amchea jivitachem xubhvortoman khup lok vachta, jim konn Jezuchem Xubhvortoman vachinant, tim porean chotraen amkam polletat ani amchi topasnni kortat. Him Kristi mon’xam koxim jietat, mogan vo dusman’kaen? Hem pollevn amchea dhormachi topasnni tim kortat. Okristi mon’xam poilea Kristanvank pollevn, oxem mhonntalim: “Polleiat, tim koxim ekamekacho mog kortat, ekamekak bogxitat” (Tertullian, Apologetikon 39:7).

2.3: Amcho nichev zavm di: Ami soglim eka monachim, eka kallzachim zanvk zai. Amchem jivit mhonnlear Devachea mogacho arso koso sogleanchea dolleam mukhar porzollunk zai. Amchem Kristanvponn Kristi mona vorvim dusreank uzvadd-pormoll zavm-di!

DEVACHEM UTOR

January 19, 2009

*Fr.Ivo da Conceicao SOUZA

(Prodheapok, Raiturche Sim’narint)

1.1: Prostavna: Aichea jogant khub iantrik-tantrik progoti zalea, dekhun ak’kho sonvsar ek lhan-so ganv zala. Hanv eksuro nam, loka lagim mhoje sombondh asat. Hanv loka lagim uloitam, lok mhoje lagim uloita. Ho, uloita to lok, mhoje ixttagotint rigta. Mhaka uloita, to mhaka totvamni ani bhavnnamni grest korta. Monis mon’xak uloita, zalear Devoi aple mogache rochnne lagim, mon’xa lagim, uloita. Ulovn ami dusreanchem jivit grestaitat, moga-ixttagotiche bandpas sthaptat. “Devachem Utor”, oxem ami sobhar pavttim aikotat, tacho orth ami kholavum-ia.

1.2: Utor amkam kollit korta, xiddkaita, ut’tejon dita, apoita, roddoita, dukhoita, hansoita. Utram vorvim amchem jivit cholta. Utrank ami khub mhotv ditat. Kitem amkam dusreamni mhonnlam, hacher ami khub lokx dhortat. Xrap amkam bhrant haddtat, kiteak mhozo dusman mhaka mhonnta vo anvddeta, tem mhojea jivitant ghoddot, oxem ami somzotat. Utrak boll asa, dekhun jem kitem ami mhonntat, eke vo dusre toren, xat’tipavta.

1.3: Dev mon’xakullak uloita, aplo nirop dita, aplo mog ugto korta. Dev mhollear mog to mogoch, oxem Povitr Pustok amkam spoxtt korta (polle 1 Ju 4:8). Dev sobhar bhasamni mon’xakullak uloilo, aplo sobd (davar, hebrev bhaxen, nhoich utor, ponn ghoddit, event) ugto kelo, atam-i to uloita. Ruximvorvim to uloilo, Bharatache poramporent khub sondesh amkam mell’la. Provadiam vorvim mon’xakullak ani Israel projek to uloilo, hem Povitr Pustokant, vo Pornnea Korarant, amkam kherit bhaxen mellta. Xekim, aplea ekleach mogachea Puta vorvim tannem aplo mog mon’xakulla khatir dakhoilo (polle Ju 3:16).

2.1: Mon’xakulla lagim aplo mogacho Korar Devan kelo, to Israel aple proje kodde thirailo, and xekim aplea Puta vorvim Novo Korar sthaplo. Povitr Pustok mhollear Devachea mogachi chitt. Hi chitt vachun Dev konn, tachi evzonn amche sovem kitem, ani amcho xevott kitem, hem sogllem gomon ieta.

2.2: Pornnea Korarant 46 pustokam asat, zalear Novea Korarant 27 pustokam asat, oxem zalear 73 pustokam asat. Pornnea Korarant, YAHVEH Israel projek Ejiptantlea gulam’ponnantli suttka dita, ani tiche kodde aplo Korar korta. Novea Korarant Dev aple bhasavnneo xat’tipavoita, aplea ekleach Putak sonvsarant dhaddta, mon’xank aplem deivik jivit dita. Aplea mornna/Jivontponna vorvim Jezu aplo Povitr Otmo dita, aplea dhormdutank ak’kea sonvsarant dhaddta, povitr-sobha sthapta.

2.3: Soddvonnik ithias chalu asa: bispam-iadnikam-grihosteam vorvim Jezucho nirop ak’khea sonvsarant ximpddot veta. Devachem Utor vistarot veta, sonvskaram vorvim somaz novsorot veta, ak’khea mon’xachem taronn chalu asa. Kuddi-otmea soit monis novsorta, Jezuchem jivit ghevn to Devasarkhelo zata, mon’xakull devachim bhurgim vortotat (become), hem povitr-sobhechem karia ithiasa xevtta porean choltelem. Devachem raj sompurnnaen pavtelem, ten’na Devak ami rup-rup polletelet.

3.1: Jen’na Misache bhettent ami Povitr Pustokachim vachpam aikotat, ten’na “Devachem Utor” ami on’bhovtat, Dev amkam uloita, Jezu Khrist amche modhim hajir asa, to amkam aplea Utra vorvim novim mon’xam korta.

3.2: Misachea iodna vorvim, zo Korar Jezu lagim amim povitr-snana vorvim suru kelolo, to atam ami thir korit asat.

3.3: Ponn ho Korar, nhoich khasgi, bogor somajik-ghorabe ektthaim zatat, ak’kho somaz ghott-thir zait veta. Ponn hem amim doreka disa jievnk favo. Oxem ami kortat zait? Oslo orth amchea monant-kallzant asa zait? Amchem ‘Kristanvponn’ khoreponninch ‘Kristi mon’ zalam?

Sompadnni: Sorvxevttim, Povitr Pustokachem xikop korun, amchem jivit grestavum-ia, amche bandpas khasgi jivitant ani ghorabeant thiravum-ia, Kristi govaiki divum-ia, amcho somaz novsaravum-ia…

Khursachem Zoit

January 19, 2009

*Fr.Ivo da Conceicao SOUZA

(Prodheapok, Raiturche Sim’narint)

1.1: Prostavna: Devachem Utor mhollear Devachea Mogacho nirop. Dev konn, hem eka on’bhovant amkam ieta. Ho on’bhov mogacho. Ponn mog sontosacheach nadar dakholl zaina. Khub pavtthim mog asa, thoim xinn asta; mog asa, thoim koxtt asat. Koxtti mog. Ponn mog mhollear harovnni (failure) nhoi, mog mhollear fosovnni (deception) nhoi. Mog mhollear zoit.

1.2: Dev mhollear mog, to mogoch (1 Ju 4:8). Mogan tannem amkam hea jogant ghatleant, teach mogan tannem amkam aplo ekloch Put dila (Ju 3:16), mogan tannem amkam aplea Putachea mornna-jivontponna vorvim soddvonn dilea.

1.3: Halinch eka bhurgeachea jivitant hem goddlem-ek xallecho bhurgo udkant uddi marli, ponn thoinch to urlo, dekhun ek dadlo thoim pavon sorta, to taka udkantlo bhair kaddta, ponn tachem kalliz cholona, dekhun to svas dita, to taka mellona. Xekim ospitalant, soglech proitn kelea uprant, to bhurgo novean jivall ani huxar zalo.

2.1: Jea mon’xan taka adhar dilo, to oxem mhonnta: “Setembrache 11ver, jem kitem Amerikek ghoddlam, taka lagun hanvem Devacher bhavart soddun dilolo, ponn atam jem kitem hea bhurgea sovem hanvem pollelam, khoreponninch ek vhodd vismit, hea khatir hanv Devacher novean bhavart dhortam”.

2.2: Osle on’bhov amkam amchea jivitant melltat. Khuris amchea jivitant khub astat. Dev amkam jivit dita, Devachem Utor amkam jivall korta. Amchi khoxi Devache khoxe pormannem cholovnk bhov ovghodd, ponn Devachi khoxi soddun kaddunk, hoch vhodd jivitacho ani sukhacho gutth. Devachem gupit jivita ami on’bhovtat, tachi khoxi ami chaktat.

2.3: Avoichea jivitant oxem ghoddta: tras, kanttech kantte, ponn teach borobor tika zaiti jivitachi khuxalkai bhogta: novo jiv uzvaddak haddunk, taka vaddhounk, taka monisponachea rostear ghalunk. Tras aslet, te atam sontosacheo ghoddio zatat…

3.1: Bhageavont Paulu Devache podvechi iad amkam korta: hi podvi Jezuchea jivontponnant dakholl zata (polle Rom 1:1-4). Devan Jezuk mornna uprant tisrea disa jivont kelo. Hich podvi Dev amche sovem dakhoita: amchea koxttamni to amkam boll-jivit dita, ek dis to amkam mornnantlim jivim kortolo. Devachi podvi amkam tacho voibhov dakhoita (Rom 6:4).

3.2: Koxttamni Jezun amkam jivitacho orth dakhoilo. Koxttamni Jezu patthim sorunk na, ponn tankam tannem fuddo kelo. Koxttam vorvim to povitr zalo, ani mon’xankoi povitr kelim. Devachea mogan vaddonk xikoilem. Ponn koxttam-mornnan tacher apli zobordosti cholovnk na, mornna vorvim taka jivontponn mell’lem (cf.Rom 6:10). To jivitachi zhor (cf.DI 3:15). To novo Adam/Monis (cf.1 Kor 15:45).

3.3: Jezu novean aplea khursacho porzoll aichea odhunik kallant dakhoita: khuris amkam voibhovak vhorta. Oslo khol-khol orth amkam mellche khatir ami Povitr Pustok ugtea monan vachunk zai. Hem ami disadispott’tim xikum-ia.

Sompadnni: Khursacho gutth mhollear amchea jivitacho vantto. Ami vaddtat, teach borobor koxttancho rosto xiktat. Koxttam vorvim amkam sontos mellta. Koxttam viret amkam sontosacho mukutt favo zaina…

Jivontponnachem Zoit

January 19, 2009

*Fr.Ivo da Conceiçao SOUZA

(Povitr Atmeache Firgojent, Moddganv)

1.1: Prostavna: Devachem Utor jivit dita, kiteak Dev mhollear Jivit. Dev kallkhacher ani vaittacher zoit vhorta ani jivit rigoita. Khristi dhormacho nirop mhollear Khursar khillail’lo Jezu, jivont zal’lo Jezu.

1.2: Vaitt hea sonvsarant bhitor sorlam, jen’na mon’xan aplem meklleponn Devacher add zhoklam. Vaittacho som’dir mon’xak girasta. Konn taka vaittantlo ani patkantlo nivartolo? Ho vichar mon’xakullak orombhak thann aslo, ponn to suttavo korunk khub mann’nneo evjileo, ponn ho prosn khoreponninch suttavo zavnk na.

1.3: Jezuchea jivontponacho orth: Khristi dhormacho nirop mhollear khursar khillail’lo Jezu, jivont zal’lo Svami (1 Kor 15:3-5; DI 2:22-23). To sonvsaracho Soddvonnar (Rm 4:25), to amche modhim ravta to Immanu-el (Rm 10:9; 14:9; 1 Kor 2:3; 16:22; Fil 2:8-11). He nodren Novo Korar upzola. Amchem zoit vaittacher ani mornnacher Jezuchea Jivontponnacher dhorlolem-thaplolem asa (1 Kor 15:14.17), hem sot poilea Kristanvank thavem zal’lem (1 Kor 15:11; DI 2:32). Devachea kortutvanchi kotha Jezuchea Jivontponnan vinnloli asli. Jezuchea Jivontponna viret tanchem jivit koddu, orth ani bhorvanso naxil’lem (1 Th 4:13). Hem sot az porean Kristi dhormachem maz-kendr. “Tisrea disa Jezu jivont zala”, hem sot Khristi porjechea “Sot’man’tam” (Credo)-nt asa.

Paskhanchi porob sogleam-von vhoddli, dhormsevik vorsacho maz. Soddvonn Jezuchea Jivontponna udexim pavta. Oxem bhavartache ucharnnent ami mhonntat: “Tujea mornna ani jivontponna vorvim soddoiloi soglo sonvsar…”

Adlea Korarant, oslo bhorvanso aslo–promannik jivont zatele aslet. Israel porza Devacho on’bhov gheta, Devachi podvi chakta, tachem visvaxiponn on’bhovta, ten’na taka Sorvpodvedar Dev, Jivitacho ani Niticho Dev, pill’lolea promannikank jivont kortolo (Dn 12:1-4) mhonn kollon ieta.

Rito Fondd ani Drisnnim: Novea sonvsarant novem jivit upzotelem, oslo bhorvanso aslo (Iz 26:7-21; polle Iz 65:16-25; 66:22).

Jezun Devachea Rajachi khobor haddli–Devachi podvi mon’xanchea ithiasant rigli, ti sonvsarachea xevttak sompurnnaek pavteli. Raxttranchea nimannea jevnnak Israelache purvoz hajiir astele (Mt 8:11). Aplea Bhagiamni Jezun nhoich sonvsari asnneachi khobor kelea, bogor “svorgar” novea, sukhest, sompurn jivitacho bhorvanso dakholl kela.

Jezu ani Sadukevam modhim jivontponna vexim uzot pett’tali, bhorvanso naslo (Mk 12:1-27). Jezu tankam protipallun oslo bhorvanso dakholl kortalo: jivontponn mhollear adlea jivitak portop nhoi, ponn novem jivit Devache podven ani visvaxiponnan melltelem (Mk 12:24-27)–Jezun aplea mornna ani jivontponna vexim tin pavttim bakit kelam (Mk 8:31; 9:31; ani 10:33-34). Hea bakitamni jem kitem ghoddlam, hem-i-bi vinnlelem asa. Ponn mukhel ghodditam mhollear promannik mon’xachem mornn, ani Devan dil’lem zoit (Mk 14:25).

Dhormdutancho Sondex: Jezuchea mornna ani nikhipinnea uprant tachea xisamni to mornnantlo jivont zalo ani to Mesiah/Krist/Obhixikt, Svami ani Devacho Put mhonn porghottlo (DI 21:23; Fil 2:9-11; Rm 1:3-4). Khursar khillail’lo monis Devan xrraplolo, oso Judevam modhim somoz aslo (Dt 21:23; Gal 3:13; 1 Kor 1:23). Khillail’lo ani jivont zal’lo Mesiah, oslo somoz tanchea monant vochonaslo.

Khub zonnamni sobhar bhasamni jivontponn somzun ghetlam. Ponn jivontponn mhollear Jezuchi kudd voibhovan bhorta, novo akhar gheta.

Sompadnni: Sorvxevttim, az amcho Bhavart ghott buneadicher dovrunk zai. Aichea odhunik kallar mon’xak ho nirop gorjecho. Jen’na mendu-moticheo pidda vaddleat, hea kallar jivitacho ani asnneacho khol-khol orth ghevunk zai. Jezuchem Jivontponn mhollear amchi khatri, amchem daiz, amchi grestkai. Jezu jivont zala, heporim amii Devaxim pavtelet, Devak rup-rup polletelet, Devachench such bhogtelet. Devachem Utor vachum-ia, tem kholavum-ia, ani sukhest jivit jievum-ia.

Jivitachi Sonvskrutai

January 19, 2009

*Fr.Ivo da Conceiçao SOUZA

(Povitr Atmeache Firgojent, Moddganv)

Prostavna: Azkal jivitak man na. Mon’xall jivit poreant bhovoch sovai zalam. Grestkai-dovlot choddlea, bhangar-xrungar vaddlam, ponn mon’xachi kimot dhenvot veta. Monis sovai zala. Khuni-krimi-chorio mottea promannan vaddot vetat. Jivitachem mol ani mhotv novean amche nodrent ievunk zai. Rogot mhollear jivit, rogtachem mol novean choddonk zai. Rogtachem mol, jivitachem mol, mon’xachem mol jivitache sonvskrutaechi bunead, oslo nihall kholaen korpacho vell pavla.

Jivit ani Dev:

Dev mhollear Jivit (polle Jer 2:13). Dev Jivitachi Zhor (Sutt 3:14; Jr 1:20; Ez 33:11). Dev Rochnnar (St 104:30), tannem mon’xak aple rochnne-podvent (creative power) vantto dila, taka jivitacho svas dila (Ut 2:7). Jivit mhollear Devachem dennem (Jb 10:12). Dev nhoich Jivitachi Zhor, bogor Jivitacho Dhoni—taka jivita voyr podvi asa (DS 32:39). Dev jivit ani jivitachem chokr (cycle of life) chalu dovorta. Dev jivit vo mornn vinchun kaddunk apoita (DS 30:15-20). Devachea Korarak chikttun ravon, mon’xan jivit vinchun kaddum ieta. Jivit teach borabor sasnnik jivitachem (vo soddvonnechem) dennem. Israel raxttrant jivit Korarachea sondorba bhitor (in the covenantal context) somzum ietalem. Jivitak mol asa, lamb auk Devachem darzonnem (DS 5:16; 30:15.19).

Adlea Korarant jivita ani uzvadda modhim barik-uxir soirigot asa. Jivita-asnneacho niz-unch orth mellche khatir mon’xan Devacho uzvadd pollevunk zai. Dev aple ap-proghottnne vorvim dita, tea uzvadda vorvim mon’xachea jivitacho niz-khoro orth mellta. Devakodde kel’lea Korarachea uzvaddan mon’xall jivitachem khorem soim’ tthavem zata.

Mornna uprant jivit asa mhonn heach sombondhan spoxtt zata. Hea Korarant vantto ghetat, te Devak, Mornnachea Dhoniak, on’bhovtat.

Jezu ani Jivit: Novea Korarant, mon’xall jivit sori korunk zaina toslem bhanddar. Devachea Rajachem xastr (ethics of the Kingdom of God) priti-mogacher dhorlolem-thaplolem asa. Aplea peleak adhar nhoikarunk mhollear Devache Somurticher add vochunk (Lk 10:30).

Jezu mhollear “Vatt, Sot ani Jivit” (Ju 14:6). To “Punorjivontponn ani Jivit” (Ju 11:25). Devachea Rajeant rig ghevunk mhollear Jivitant bhitor sorunk. Devachem Raj ani Jivit Xubhvortomanamni ekach orthan ietat. Jezu amkam jivit subham’ponnan divunk aila (Ju 10:10). Israel projek gulam’ponnantli suttoiloli (Sutt 6:6), techporim Jezu, Soddvonnar, amkam patka-vaittantli suttoita.

Povitr Pustokantlo Dev mhollear jivitacho Dev, to “mel’leancho Dev nhoi, ponn jiveancho Dev” (Mt 22:32). Povitr Pustok jivitachea totvamni suru zata ani xevttak pavta (polle Ut 1:3-4; Prok 21:4; 22:5). Povitr Pustokachi tenkxi mhollear rochnnechi sopurnai–kallokh na, koxtt na, mornn na–jivo Dev sasnnak rajvott choloitolo. Jivita add veta, titlem-i Dev tiche sorxili poisaita: gulam’ponn, pillnnuk, broxttachar, hin’sa, dukh ani koxtt, onit ani vegllochar. Ho vavr Jezucho, to “Mesiah, Jivea Devacho Put” (Mt 16:16). Hoch Povitr-sobhecho vavr, hench tichem apovnnem.

Jezuchem punorjivontponn mhollear sasnnik jivitachea bhorvanxeachi bunead (1 Pd 1:3). Jezu Jivitacho Kunvor, tannem khursar morun ani jivont zavn, jivit haddlem (2 Tim 1:10). To Jivitacho Unddo (Ju 6:35.48), Jivitachem Udok (Ju 4:10; 7:38), tache sovem Jivitachim Utram asat (Ju 6:68), tachim utram mhollear Otmo ani Jivit (Ju 6:63), to mon’xank Jivit divunk aila (Ju 6:33; 10:10). Ami jivitant ani promannikponnan cholunk-jievunk zai (Rm 6:4). Deivik jivitant vantto ghevun, ami ek dis Devachi mhoima ruprup polletelet (1 Kor 13:12; cf.2 Kor 5:7). Xevttim, sasnnik jivit mhollear Devachea sombondhan jietolo bhavartacho somudai.

Sompadnni: Sorvxevttim, Devachem Utor amcheach jivita vexim uzvadd dita, amchem vorteponn gaita. Ghorabeam vorvim amim mon’xall vorteponn samballunk zai. Amchea ghorabeanchem durdoiv mhollear mon’xaponn grestkae-dovlotik ani bhangar-xrungarak vikhunk. Amche ddolle ugte korum-ia: mornnachi sonvskrutai poisavum-ia, jivitachi sonvskrutai vikasum-ia, mon’xallaen ani povitrtaen vaddom-ia…

Mon’xall Sudharop

January 19, 2009

c*Fr.Ivo da Conceiçao SOUZA

(Povitr Atmeache Firgojent, Moddganv)

Prostavna: Mon’xak gnean ani apkhoxi asa. Mon’xachem khud sudharop zanvche khatir, mon’xan aplem gnean vikasunk zai, tech bhaxen aplem kalliz akharunk zai. Grestkai-dovlot, bhangar–xrungar asot, tor monis sudharla, oxem mhonnpachem nhoi. Novim iontram mon’xan rochun haddleant, ponn monis sudhronk na. Taka koslo sobhav (character) asa? Ho vichar amim korcho, hem odhik gorjechem. Hi avoibapaianchi, xikxokanchi, iodnikanchi, fuddareanchi zobabdari. Hea vixoiacher amkam Povitr Pustokant kosli xikovn mellta, hem barkaen pollevum-ia.

1.1: Adlea Korarant, Amos provadi ulo marta: “Borem sodat ani vaitt soddun diat, ani oxem tumi jivim urteleat” (Amos 5:14). Mon’xall sudharop totvancher-muliancher (principles-values) dhorlolem-thaplolem asa. Amcho sobhav akharun, novo somaz bandum-ieta.

1.2: Ezekiel provadiak Dev suklolea haddanchem dorxon dita, aplo svas bhitor ghalun, tankam novo jiv dita (polle Ez 37:1-6). Novo iug rig ghetolo, jen’na Povitr Atmo aplo svas ak’khea sonvsaracher vistartolo.

1.3: Jeremias provadi Novea Korarachi khobor korta: nhoi fatranchea folleancher kantoiloli Somurt, ponn kallzam bhitor khonchoiloli Somurt, novem kalliz ti projek Devachi khol-khol vollokh diteli. Ezekiel provadi bhitorle Somurticho ugddas korta, fatrachem kalliz nhoi, ponn masachem kalliz, novo atom. Dev aplo Atmo amche bhitor ghaltolo, ani deivik margar cholunk xoketai asteli. “Deivik marog” mhollear Devache khoxe-evzonne pormonnem, pritimogan jieunk.

1.4: Izaias novea kallachi-iugachi khobor korta: “Polleiat, atam hanv novo svorg ani novi prithum’ rochunk vetam, adlea kallachi anik iad aschina, mon’xachea monant anik tacho ugddas ienvcho na” (Iz 65:17). Dekhun Stotrkar prarthon korta: “Nirmoll kalliz, Deva, rochun ghal mhojea horddeant” (St 51:10). Amchem kalliz novsorun Dev ojapam-vismitam korta. Devoch amcho Guru-gonvlli zata, kiteak “Tim soglim Devan xikoil’lim mon’xam zatelim” (Ju 6:45; polleIz 54:13).

2.1: Xubhvortoman amkam sangta tea pormonnem, jen’na tornno-dhaktto Jezuk mellunk ailo, ten’na Tacher chit’tan nodor marun, Jezun tachi oprubai keli (Mk 10:21). Tornnea-dhaktteak Jezu dakholl korta ki “sasnnik jivit” mellta, jen’na ami amchem kalliz Devache adhin kortat. Amchem kalliz bodlun, adnea samballunk zai, ekach utran peleacho mog korunk zai. Ponn amchem kalliz sam’kench mekllem asunk zai. Amchem kalliz grestkaek chikttun ravon, sukh mellona. Jezucho pattlav korun, amchem kalliz ritem korun, Devache sopurnaen bhorunk zai (polle Mt 19:16-22).

2.2: Monis sotan, nitin, mogan jieunk zai. Sot amkam mekllim korta. Jezu mhollear Sot (Ju 14:6). Jezu sotak govaiki diunk aila (18:37). Jezu Povitr Atmeak pattoita, amkam eksurim dovrina, amkam onath sanddun vochona. To Sotacho Atmo, to amkam sotachi khol-khol vollokh ditolo (Ju 14:17; 15:26; 16:13). Amchem sudharop zavnche khatir Povitr Atmo amchea kallzamni jieta. Sot amkam suttka dita. He bhavartache nodren Bhag.Paulu mhonnta: “Jieta to hanv nhoi, ponn Krist mhoje sovem jieta” (Gal 2:20).

2.3: Grest monis, grestkaek chikttun jieta, zalear to gulam’ponnan jieta. Dekhun Jezu mhonnta: “Hanv tumkam sot sangtam: grest mon’xak Svorginchea Rajant bhitor sorunk kotthin zatelem” (Mt 19:23; Mk 10:23; Lk 18:24). Ek mhonn’nni asli, ticho to vapodd korta: Eka grest mon’xak Svorginchea Rajant bhitor sorche poros, eka unttak suiechea bidd’ddeantlean vochunk odik sompem (v.24). Grestkae-duddvancho gulam’ zaum noie (polle 1 Tim 6:10).

3.1: Amcheo xalla novsornnechim sthanam-zage vortovunk favo: lhan-tornnea bhurgeancho sobhav akharunk, hi xikxokanchi zobabdari. Xalla ugti korunk mhollear bondkhonn bond korunk. Oxem zalear bori xikovn, bori dekh, borem xikxonn amchea xallamni asunk favo.

Sompadnni: Sorvxevttim, bore xikxok amkam zai. Boro sobhav tankam asunk favo. Amche rajki fuddari, tech bhaxen amkam bori dekh diunk zai. Oslea borea sobhavachea rajkornnarank amim motam diunk zai, oslea borea xikovpeank ami venchun kaddunk zai.

Firgoz-sobheche Zomaticho Vak’ko

Agostache 6ver, sokallchea ikra vaztam, Firgoz-sobhechi Zomat bhorli, hajir ason amcho Padri-Vigar, amche igorjent vavurtole amche Padri-bhav, Padri Kopelanv ani doreka vaddeache sumar pon’nas protinidhi.

Suruvatechem magnnem korun zomatik suruvat dili, magnnea uprant Pri. Simon-an “Bhavartachi Vatt Dhorop”, hea vixoia voyr xikovn dili. Povitr Pustok vachop ani amchea jivitant tem pallop, hem amkam bhov gorjechem, ten’na ki ami amchem ghor khoddpar bandunk pavtelenv, oxem tannem amkam sanglem.

Uprant to Dis Gonvlliank bhettoilolo axil’lean, Pri.Cota-n ghoddlolo ek dhakttulo Manddo amchea Padri-bhavam khatir gailo, ani magir amchea Gonvlli-bhavank ekek ful bhettoilem.

Magir sogleamni eka dhattulea khellant vantto ghetlo, lhan-xem magnnem korun jevnnant vantto ghetlo, xekim sovai-ek vaztam amchi zomat sompli.

Marionetta Miranda

Uzvaddachim Bhurgim

January 19, 2009

*Fr.Ivo da Conceiçao SOUZA

(Povitr Atmeache Firgojent, Moddganv)

Prostavna: Mon’xak uzvadd zai. Kallkhacher zoit vhorunk, hem amchem apovnnem. Kallokh uzvadd, khoim amkam mellta?

1.1: Adlea Korarant, Dev uzvadd rochta (Ut 1:3). Zhoim kallokh also, “prithumik akhar naxil’lo, som’dir kallokhant buddlolo”, thoinsor uzvadd ieta. Uzvadd mhollear jivit, soddvonn, boreponn (Ps 4:6; 36:9; 56:13). Israel raxttrank uzvadd (Iz 60:3). Uzvadd mhonnche Somurticho vo Zannvaiecho uzvadd (Zann 7:26).

1.2: Qumran-ant oslo dhormxastr vikaslo: uzvaddachim ani kallokhachim bhurgim asat (1QM 13:5.14-16; 1QS1:9; 2:16).

1.3: Novea Korarant, Xubhvortomanmni ani Dhormdutanchea ithiasant sumar pon’nas pavtthim hem utor “uzvad” (phos) ieta, Juanvachea Xubhvormantoch tevis pavtthim cholta. Uzvadd mhollear krupechem jivit, deivik mog, atmik jinn. Jezu sonvsarak uzvadd (Ju 1:9).

Jezu, Sonvsaracho Uzvadd. Ho uzvadd mhollear Jivit (polle (Ju 1:4; cf.8:12). Dev mholelar uzvadd (1 Ju 1:5; cf.Jak 1:17). Jezuk sotmanun, amkam Jivit mellta, ami uzvaddachim bhurgim vortotanv (Ju 12:36; cf.Mt 5:14; 1 Th 5:5).

1.4: Jivit mhollear “soddvonn”, kallkhant jietat tankam to dakhounk (Mt 4:16; DI 13:47; 26:17.18; Ef 5:8; 1 Pt 2:9). Eka kallar lok kallokhant also, atam povitr-snana vorvim uzvaddant aila. Dekhunoch uzvaddachea bhurgeanchi chal dhrounk zai. Uzvaddacheo kornnio mhollear sogllea jin’sanchem boreponn, promannikponn ani sot. Kallokhachim holkim kortubam amim poisavunk zai. Suriachim kirnam amchea khasgi disadispott’ttea jivitant fankunk zai. Ami venchun kaddloli kull, Deva-Raiache iadnik, Devache sevek sonvskarlolem raxttr, Devan apnnailoli proza. Atam amkam Devachi kakullt mell’lea, tacho uzvadd mell’la, tachem jivit mell’lam.

2.1: Jezuchem Zoit mhollear Punorjivontponn. Jezucho Uzvadd amchea kallzamni bhitor sorta ani amkam vivek dita (2 Kor 4:6). Ami amkanch proghott korinant, ponn Jezuk, khursar marlolea ani Jivont zalolea jezuk ami govaiki ditat. Kallokhantlim ami bhair sorleant, uzvadant ami bhitor sorleant. Ho porzoll Kristachea mukhamollar porzollta, to amchea gneanant fankunk zai.

2.2: Uzvaddant jievunk mhollear uzvadant cholunk, borem korunk, vaitt soddun diunk. (polle Rom 13:12). Nhidentlim uttcho vogot pavlo, soddvonn amkam lagim asa, ratr soro aili, dis lagim pavlo. Kallokhacheo vaitt kornneo soddun dium-ia, zhuzachim hatiaram geun disa-uzvaddachea kornniank lagum-ia, oxem Bhagivont Paulu Rom’karank xiddkaita.

2.3: Soglea dhormani uzvaddachi khunna mhotvachi. Uzvaddacho Utsov Deepavalli (vo Divali) amkam hem chitr haddta. Ponn ami hea uzvaddacho orth somzun gheunk zai. Dusreanchi ttika korunk favna, ponn dusreank soeg diunk zai, tanchem mon amche xikvonnecher amchea jivita vorvim vochunk.

3.1: Dusrea dhormancho orth amim ghevum-ia. Uzvadd Jezu amkam dita, hacho obhiman korun ami dusreank amchea jivitache chalin hea uzvaddak govaiki divum-ia.

Sompadnni: Aichea somazant khub avhanam amkam melltat: borxttacharacher add amim zhuzunk zai, ho amcho mukhel vavr. Ponn tea bhair, khub fottingponn asa, bholatkar, chorio-krimi-khuni, hea velar amim uzvaddachea xenkddeant jietat, oxem amcheamni mhonnun ieta? Uzvadd gneanacho, to kallokh kallzancho? Dekhun amchi novsornni zaunk zai. Amim nhidentlim uttunk zai. Uzvaddachim bhurgim zaum-ia, Jezuk amchea aichea somazant dium-ia.

“Povitr Zaiat”

January 19, 2009

*Fr.Ivo da Conceiçao SOUZA

(Povitr Atmeache Firgojent, Moddganv)

Prostavna: Doreka mon’xak sukhest zaunk apovnnem asa, tem soimantoch asa, dekhun mon’xak sukhan jievpak itsa-anvddo asa. Ponn ho anvddo Devanoch rochlolea mon’xall angant asa. Jeporim mreum udkak taneta, tech porim monis sukhak otrekhta. Sukh mon’xachea jivitacho rosto ani xevott. Sukhant jienvche khatir mon’xan favto rosto dhorunk zai, vaitt roste poisavunk zai. Ekach utran, Dev povitr, toso monis povitr zaunk zai. Hench mon’xak Devachem apovnnem, hich povitrtaechi ani sukhachi vatt.

1.1: Dev Povitr: Levi-xastr povitrtaecho rosto xikoita: “Povitr zaiat, kiteak Dev povitr” (Lv 19:1). Provadi tich xikovn ditat. Izaias provadi suruvatechea dorxonnant Devachi povitrtai polleta (Iz 6:1-13). Tachi mhoima nhoich Jeruzaleak, bogor ak’khe prithument rig gheta (Iz 6:3). Somajik nitichi to khobor korta, kiteak oneai ani osoktanchi pillnnuk Devache povitrtaecher add veta (Iz 1:10-17; 3:13-15; 5:1-10; 10:1-4). Devachi podvi sorv raxttrancher vistarta. Dev Israelacher ani Judacher kheast dhaddta, ponn teach borabor tankam bhorvanso dita. Devachi nit mogan vinnloli asa. Hich Devachi povitrtai.

2.1: Mon’xachi Povitrtai: Devachi sasnnik evzonn mhollear mon’xak aplea jivitant rig diunk, taka aplea sukhant ani mogan vantto mellunk (polle 1 Ju 4:10). Mon’xak Deva sovem sukh mellta, nhoi grestkae-dovlotint, bhangara-xrungarant vo podvent (polle Lk ). Monis Devachea hatant surokxit, taka visvaxi ani pallok ravun kuxal urta (Hab 2:1-5).

2.2: Ezekiel provadi tech bhaxen Devache povitrtaeche nanvim broxttarachar ani oniticher add uloita. Devachi puja mon’xanchem vorteponn gaita. Dhormsevent vantto gheun, mon’xanche hok’k paeam tolla mostum nozo. Hem vaitt Devache vollkhicher ani Koraracher add veta. Dev aple updes mon’xank dita ani tankam povitrtaecho marog tankunk apoita. Patkacho marog Devache povitrtaecher add, Koraracher virudh, mon’xachea sukhacher virudh.

3.1: Devacho Korar ani Povitrtai: Dev mon’xam lagim Korar korta, tankam aple dha updes dita. Aple osoktaen monis Devache updes moddta. Ponn Dev aplem jivit-mog, novem kalliz, aploch Povitr Atmo mon’xachea horddeant ghalta (Jr 31:31-34; Ez 36:23-28). Novem kalliz, novo rosto, povitrtaecho marog, novem mondir, novi dhormseva.

Sompadnni: Sorvxevttim, povitrtai mhollear sukhachi ani sovostkaechi vatt. Azkal monis sukhache roste sodit asa, ponn niz-khorem sukh taka mellona, kiteak sukhacho rosto uxir, koxttancho rosto to, koxtti mogacho marog. Tornne-dhaktte gungi-vikhari okhdamni visov-sukh sodtat, ponn tankam dukh, kantte-kanttech melltat.

Logn mhollear khursachi vatt, jivit mhollear vaura-trasancho rosto. Sukha-sovostkae khatir vaurunk kallza-sobhavache akharnnechi goroz, mon’xall novsornnechi goroz. Kantteam viret gulab na, koxttam vinnem mukutt na, khursa vinnem povitrtai na. Jezuchea mornna-jivontponna vorvim povitrtai, sukh, jivit…

“Soddvonnar Zolmola”

January 19, 2009

*Fr.Ivo da Conceiçao SOUZA

(Povitr Atmeache Firgojent, Moddganv)

Prostavna: Monis sopnamni jieta, mon’xak sukh zai, sudharop zai. Patka vorvim dukh ailem, mon’xachem jivit bigddot gelem. Hea vellar Dev mon’xakullak uloita, aplo gutth ugto korta, aplo Korar korta, apleo bhasavnneo uch’charta, apli evzonn thavi korta. Jezuchea zolma vorvim jem kitem gupit aslem, tem thavem zalem.

1.1: “Bieum naka! Polleiat: Vhodda sontosachi khobor hanv tumkam gheun ailam; ani hoch sontos sogle projek bhogtolo; tor az Davidachea nogrant tumkam ek Soddvonnar zolmola; to Krist Svami. Ani hi tumkam khunna: falleamni guttlail’lo ani khavnnent dovorlolo tumkam ek Ballok melltolo” (Lk 2:10-12). Hea utramni vhodd gutth atthaplolo asa, vhodd nirop uch’charlolo asa. Sonvsarant patok vistarot vetalem, mon’xak soddvonn zai asli. Soddvonnar ieuncho asa, oso bhorvanso choddot-vaddot vetalo. Ho nirop mon’xakullachea jivitant ek novo avesvor ugto korta, ek novo iug suru korta.

1.2: Ballok Jezu zolmola. To konn zait? To sonvsaracho Soddvonnar: “Ti eka putak zolm diteli,ani tum taka Jezu mhonn nanv ditoloii, kiteak aple projek tichea patkantli soddoitolo to Toch” (Mt 1:21). To Davidacho put, to Bethlehem’-ant zolmola, tem Davidachem xhar, oxem Lukas chitarun dakhoita; to khavnnent zolmola, jeporim Salomanv patxaiak falliamni gutthlailolo (Zannv 7:4). Taka projen manun ghetla. Taka gaddum vollkhota, tachi proza manun gheta—gonvlli taka vochon nomoskar kortat: To “Amche modhim Dev” (Im’manuel) (Iz 1:3).

2.1: Dekhunoch sontos mon’xakulachea jivitant rig gheta. “Bhov unchlea svorgar astea Devak mhoima, ani prithver astea mon’xank Tachi doia ani xanti!” (Lk 2:14). Hi khobor svorgar ani jogant gazta. Gonvlli taka nomoskar korunk ietat, nokhetr-xastri-patxai taka bhozunk ietat… Nokhetr Mesiaschi khunna. “Kallokhant choltolea lokak ek vhodd uzvadd drixttipoddlo; mornnache savllechea desant jietolea somestancher ek uzvadd fanklo” (Iz 9:1). Ho khoreponninch ek novo iug. “Kolsunno ani menddro sangata jietele, bibtto-vag bokuddleache kuxik add poddtolo, paddkulo ani xnvachem por borabor chorvak vetelim ani ek supurlo bhurgo tankam chorvak vhortolo. Gai ani ansvel ektthaim chortelim ani tanchim poram ektthaim nhidtelim. Xinv boila bhaxen tonn khatolo. Dudachem bhurgem sorpache dholi-xim khelltelem. Supurlem bhurgem furxeachea billkant hat ghaltelem” (Iz 11:6-8; polle Iz 35:1-10). Hem soglem novem-atvem: mon’xakull novean ekcharant jieteli.

2.2: Devan sonvsaracho itlo mog kelo ki aplea ekleach Putak dilo (Ju 3:16). Dev mog, mogoch, to amkam aplo Put dita (polle 1 Ju 4:8). Novo iug (new era) suru zala (Iz 11:1). Hea novea iugant novem kalliz, novo otmo. “Udelem amkam bholeponn Deva amchea Soddvonnarachem, udelo Tacho vhodd maiemog mon’xam thaim!” (Ti 3:4).

3.1: Natalanchi Porob mhollear kuttumbachi porob. Natalam koxim ami somarombhchim? Vhodd dennem mhollear amim mogan jieunk, ekamekak kan diunk. Azkal soglinch uloitat, konnoch aikona. Zaito lok eksuro jieta, tim ulounk sodtat, tankam aikopak konnoch na, tankam kan diunche. Mogacheo khunna ami ditat, ekamekak umo, mogache umalle, sukhache anvdde ani otrekh… Sontos mhollear amchem dennem amkanch ani sogleank. Xabaski, mhotv ani mol diunchem, dusreank kikont korchim nhoi. Chaltim oprubaechim utramni vismitam korum ietat.

3.2: Prartnachem ani sonsvkarnnechem mon—hem ek vhodd dan. Natalanchim kardam dhaddtai, tanche pasvot magnnem kor. Tuka rag ieta, tanche pasvot mag. Tuka nirdukai dista, tancho ugddas magnneantlean kor. Adhar diun, tanche prosn suttave korun, tankam il’laz diun, tankam onond diun, amchoch sontos vaddtolo. He toren dodolak, kulkulank, oddeank, neuvreank odhik ruch asteli…

Sompadnni: Sorvxevttim, Jezu Soddvonnar amkam subhamponnim jivit diunk aila. Dusreank osle torechim dennim diun, amchench jivit grestavum-ia, amchoch sontos vaddoum-ia…